CONGRESO BIBLIOTECAS ESCOLARES EN TRÁNSITO

Recollemos aquí a información sobre o congreso Bibliotecas Escolares en Tránsito, celebrado en Santiago os días 10, 11 e 12 de Novembro de 2011., e no que tiveron unha participación moi importante as Bibliotecas Escolares galegas...
 http://www.bibliotecasescolaresentransito.com/

BIBLIOTECAS ESCOLARES GALEGAS

Este vídeo foi rodado en varios colexios e institutos galegos que participan no Plan de mellora de Bibliotecas escolares. e presentouse no Congreso Bibliotecas Escolares en Tránsito, celebrado en Compostela os días 10, 11 e 12 de novembro de 2011, organizado pola Consellería de Educación en colaboración co Ministerio de Educación.

Biibliotecas Escolares en Tránsito [GAL] from Bibliotecas Escolares de Galicia on Vimeo.

ONDE A LINGUA SABE A PAN.....

No colexio Virxe da Saleta de Cea fixeron este lipdub convidándonos a saborear a nosa lingua a ritmo de rock e con sabor a pan...

MULLERES PIONEIRAS

Grazas a Olga, responsable da biblioteca do CEIP Milladoiro de Malpica, podemos coñecer a traxectoria dun conxunto de vinte mulleres galegas que como empresarias e emprendedoras...foron protagonistas da nosa historia . Estas biografías, que fixeron posible visibilizar o traballo das mulleres en Galiza, formaron parte da exposición PIONEIRAS, que co apopio do desaparecido Servizo Galego de Igualdade percorreu Galicia no ano 2009. Un traballo estupendo que é necesario, máis que nunca, recuperar!

Open publication - Free publishing

CLUB DE LECTURA 2011-2012. QUEN SOMOS NESTE CURSO?...

Comeza un novo curso. Iniciamos de novo a andaina do noso Club de lectura que neste curso formamos:
1º A.-    Iván Iglesia Troche
             Pablo Merlán
             Yuyi Sun Zhao
1º B.-    Alicia Acción González
             Deysi Raquel Acosta González
            Antía Saavedra Gómez
            Andrea Vila Paz
3º A.-   Xián Lois Alcayde Dans
            Pedro Paz Mongil
            Claudia Rolle Leis
  4º D.- Cibrán Otero Casal
             Sheyla Fraga Rodríguez
             Nerea González Pereiro
             Jordi Gumuccio Mamani
             Daniel Queijo Teijido
             Héctor Villar Mahía
             Paula Yáñez Martínez
         Ademáis das profes.- Luz Rivas e Begoña Valdés

Comezamos o curso con tristeza.

Temos que despedir á compañeira Mª Dolores Martínez Tobío, docente no IES Luis Seoane de Pontevedra e responsable da biblioteca escolar do centro. Hai só uns meses que Mª Dolores nos puxo a Salvar Libros por centros de toda Galicia. Salvar os libros que valen a pena, as linguas nas que se escriben eses libros, as bibliotecas nas que se gardan... a memoria dunha mestra que día a día traballou a favor da cultura e a educación.

Este é un documento colaborativo como tantos outros nos que Mª Dolores adoitaba participar co seu habitual entusiasmo. Desgraciadamente convocounos hoxe a súa despedida e pensamos nesta pequena homenaxe que xorde da mesma rede que ela axudou a tecer. Canto tempo e ilusión dedicados a Biblioiris, a súa bitácora vinculada á biblioteca escolar do instituto!  Por iso os nosos blogs lamentan hoxe a súa ausencia. Por iso esta entrada será publicada por moitos outros centros, ademais dos que aquí figuran. Esperamos que este documento saiba representar tamén a tantas persoas que, desde a rede PLAMBE das bibliotecas escolares galegas, desexan expresar o seu pesar e as súas condolencias á familia e amigos da nosa compañeira. Son tantos os centros que a súa relación excede as dimensións deste documento.

Grazas Mª Dolores polas palabras, polas reflexións, polas propostas, polo tempo, polo que fixemos xuntos e que permitirá seguir camiñando pola ruta das bibliotecas escolares.

Cristina Novoa

Pilar Sampedro

Asesoría Bibliotecas Escolares

Imaxe das ligazóns: Rapaza lendo. Gustav Adolf Hennig

A INSOPORTABLE LEVEDADE DAS BIBLIOTECAS ESCOLARES GALEGAS

A INSOPORTABLE LEVEDADE DAS BIBLIOTECAS ESCOLARES GALEGAS
Ante a previsible retirada de formadores específicos no ámbito das bibliotecas escolares no Servizo de Formación do Profesorado, no Centro Autonómico de Formación e Innovación e nos centros de formación e recursos dependentes da Dirección Xeral de Educación, Formación Profesional e Innovación Educativa, segundo o borrador da orde que convocará concurso público de méritos para cubrir postos de persoas directoras e asesoras nestes centros queremos manifestar o seguinte.

Hai proxectos que nacen marcados pola vulnerabilidade e a razón desta circunstancia non ten nada que ver coa falta de rigor ou a pouca entrega das persoas que os poñen en marcha. Máis ben ten que ver co feito de que nacen destinados a nadar contra corrente. Con todo, esa é a principal razón da súa existencia: xorden porque responden a unha necesidade non satisfeita pero compartida por un número crecente de persoas que senten que é posible compartir e facer viable o proxecto xuntos. Así naceu o movemento que cristalizou na iniciativa que todos coñecemos como PLAMBE. De xeito que dende hai algúns anos, esa iniciativa levou o mellor da creatividade e o esforzo de moitos docentes que xenerosamente regalaron o seu tempo e a súa capacidade de formar equipos e ilusionar a outros docentes en centros e centros de toda a nosa comunidade. Xuntos aprendemos a ser rigorosos e esixentes nos nosos proxectos, a crear espazos de aprendizaxe colaborativo, de cambios de estratexia, de achegamento ás novas tecnoloxías, de racionalización na xestión da información. Que ninguén se equivoque: os responsables das bibliotecas escolares non son seres evanescentes perdidos en vanas quimeras que tentan “roubar” horas a materias “importantes” para que o alumnado esmoreza entre mundos de ficción. Nada máis lonxe da realidade. Nun centro onde hai un equipo que xestiona a biblioteca de forma eficaz nótase. Os fondos adquírense con criterio, establécense acordos para xestionar a información, créanse espazos de colaboración e docencia compartida. Non é doado porque a maquinaria educativa ten unhas inercias difíciles de combater. A pesar de todo, estes docentes fórmanse e exercen a súa dura misión en horas non retribuídas, roubadas ás súas familias, ao descanso, ao lecer. Fomos coordinados con rigor e seriedade pola Asesoría de Bibliotecas Escolares pero sempre nos faltou o marco legal axeitado. A nosa misión é dura porque queda moito por definir. Na nosa inxenuidade e boa fe esperabamos conseguir progresivamente tempos e formación para seguir mellorando na nosa función se demostrabamos que eramos rigorosos e eficaces. Os nosos méritos como colectivo son dabondo coñecidos polos nosos gobernantes e acreditados por diferentes administracións e ámbitos a nivel estatal. Os numerosos e constantes premios anuais de boas prácticas concedidos polo Ministerio de Educación y Ciencia non caeron do ceo. Durante todos estes anos a formación recibida foi fundamental para levar a cabo actuacións rigorosas e enfocadas na dirección correcta.
Sabemos das cuantiosas axudas que a Dirección Xeral de Educación, Formación Profesional e Innovación Educativa, destina a outros proxectos, dos incentivos para a elaboración de contidos dixitais por parte das empresas editoriais, entre outras iniciativas. Non sería tamén interesante fomentar a produción de materiais propios e promover desde cada centro a estandarización de procedementos que axuden a xestionar a información entre o noso alumnado sen confiar todo a eses materiais externos que proceden da industria editorial, por valiosos que poidan ser? Por que non seguir aproveitando a experiencia e valía dos equipos das bibliotecas escolares nestes cometidos?. O noso empeño sempre foi crear nos centros pequenos focos que tentan estender esas boas prácticas de innovación e excelencia. Non entendemos este novo e repentino xiro na política de formación desta Dirección Xeral. Non nos parece xusto posto que, podemos dicir honestamente que, pola nosa banda, cumprimos con fartura. Ao desmantelar as estruturas que nos sosteñen o deterioro será proporcional ao entusiasmo e o esforzo investidos: inmenso e imparable. Algúns lembramos como o noso Conselleiro lanzou un bico ao aire ao despedirse dos asistentes aos últimos encontros despois dunhas entusiastas palabras de eloxio polos éxitos logrados polas bibliotecas escolares galegas a nivel estatal. Onde quedou ese entusiamo? Que interpretación debemos facer? O noso país pode permitirse tirar pola borda todo este traballo? E nós?. En que situación quedaremos agora diante das nosas comunidades educativas se despois de tanta insistencia é a propria Consellería a que nos invisibiliza?.

SALVANDO....A FALA de Manuel María

A FALA

O idioma é a chave
coa que abrimos o mundo:
o salouco maís fleve,
o pensar máis profundo.

O idioma é a vida,
o coitelo da dor,
o marmurio do vento,
a palabra de amor.

O idioma é o tempo,
é a voz dos avós
e ese breve ronsal
que deixaremos nós.

O idioma é un herdo
patrimonio do povo
máxicamente vello
eternamente novo.

O idioma é a patria
a esencia máis nosa
a creación común
meirande e poderosa.

O idioma é a forza
que nos xungue e sostén.
¡Si perdemos a fala
non seremos ninguén!

O idioma é o amor
o latexo, a verdade
a fonte da que agroma
a máis forte irmandade.

Renunciar ó idioma
é ser mudo e morrer
¡Precisamos a lingua
se queremos vencer!

Gustaríame salvar este POEMA porque .... fala do noso, da nosa identidade, da importancia que ten para nós a nosa lingua, a que herdamos dos nosos avós. A nosa lingua é a máis valiosa chave para abrir e descubrir o mundo e a vida...

SALVA UN LIBRO

"Ao primeiro nin sequera estaba seguro de que se tratase dunha boa idea. Ocorréuseme mentres contemplaba ese papeis con anuncios de todo tipo que a xente pega nos lugares máis frecuentados[…] É doado distinguilos, pois pola parte de abaixo a folla sempre está recortada formando tiras onde aparece o teléfono ó que hai que chamar […]
Así que entra dentro da lóxica que se me ocorrese algo parecido cando volvín atopar un deses libros que me alborotan o corazón e me devolven a alegría de vivir. Ao rematalo, asaltoume de novo o desexo que sempre sentín neses casos: telefonar aos amigos, saír a berrar no medio da rúa, proclamalo a todo o mundo. Dicirlle á xente que non poden segfuir vivindo sen ler un libro así, hai demasiada beleza nel para ignoralo[…]
Ainda non era ben consciente do que quería facer, cando xa estaba diante do ordenador, copiando as primeiras liñas daquel libro de relatos que me tivera absorbido nos días anteriores […]
Imprimín vinte follas, en papel de cor azul. Despois tiven que recortar a man as tiras da parte inferior; foi un traballo laborioso, pero pagou a pena. Nelas, en vez do número de teléfono, escribín o título do libro e o nome do seu autor…"

Gustaríame salvar este libro porque... Porque nel aparecen dez fermosas historias de amor que son máis que nunca necesarias para sobrevivir día a día. E sobre todo un fermosísimo conto titulado UN RÍO DE PALABRAS que é un dos mellores convites á lectura que se pode facer…

SALVANDO LIBROS

SALVANDO LIBROS Que libro salvarías ti?

Open publication - Free publishing - More biblioteca

Esta exposición xorde dun traballo colaborativo entre 96 bibliotecas escolares galegas e pretende ser unha chamada de atención sobre a importancia de apreciar, coidar e manter o noso patrimonio cultural escrito. Pretendemos difundir a idea de que é imposible destruír os libros e os valores que neles se transmiten se somos quen de conseguir que formen parte de nós para sempre.
Esta actividade foi coordinada por Sabela da Escola Unitaria de Vide e Mª Dolores do IES Luís Seoane, que se encargaron da recolleita de todos os materiais...
Grazas tamén a Jaime Eizaguirre Santillán, ex-alumno do IES Sánchez Cantón, que deseñou estes carteis tan fermosos e orixinais para facer posible a actividade.

Aquí podemos ver unha escolma de libros salvados nalgúns dos centros de Primaria e Secundaria que participamos, así como de algunhas persoas relacionadas co mundo das letras e da cultura...

Open publication - Free publishing - More biblioteca

Open publication - Free publishing - More carteles

LOIS PEREIRO

Aquí podedes ver unha presentación en power point feita por Elvira Roiz do IES Concepción Arenal de Ferrol sobre o poeta monfortino lois Pereiro, ao que se adica o Dia das Letras Galegas neste ano...

LoisPereiro1_Intro

View more presentations or Upload your own.

LoisPereiro2_Monforte

View more presentations or Upload your own.

LoisPereiro3_Madrid

View more presentations or Upload your own.

LoisPereiro4_Coru1

View more presentations or Upload your own.

LoisPereiro5_Coru2

View more presentations or Upload your own.

EU FALO GALEGO....

No IES Fontem Albei de Fonsagrada fixeron este estupendo vídeo co que gañaron o Concurso do Correlingua 2011. Parabéns polo voso traballo.