Intercambio 2017

Coristranca

No blog do club de lectura do CPI Alcalde Xosé Pichel colgaron un feixe de fotos do día do Intercambio 2017.

Xa estamos contando os días para o seguinte. Moitas grazas por esta agarimosa lembranza!

A galiña azul

Vida e obra de Carlos Casares

Animámonos a facer booktrailers?

A galiña azul

Estes días anda o pobo un pouco alborotado. Acórdaste dun rapaz que se chama Lorenzo e que andaba sempre na compaña dun can pequeniño de rabo zuro? Pois Lorenzo ten unha galiña azul con cinco plumas vermellas na á dereita.

Y unha galiña moi bonita e moi rara. Pon ovos de colores. Xa puxo dous marelos, un rosa e tres verdemar. Ademais non di cacaracá como as outras galiñas, senón que di cocorocó. E isto ten preocupadas as autoridades.

Tan preocupadas as ten que hai catro días chegoulle un oficio a Lorenzo pedíndolle que entregase a galiña polas boas. Lorenzo negouse, porque aínda que lle din que só é para que a vexa un veterinario, o certo é que, segundo dixo o señor Casimiro, o porteiro do Concello, a galiña vana matar.

O alcalde, Manolito Listón, dixo nunhas declaracións que fixo para a televisión e para os xornais, que non se podía tolerar a existencia dunha galiña azul, porque, segundo Manolito Listón, unha galiña azul que pon ovos de colores e que di cocorocó en vez de cacaracá no é unha galiña como é debido.

O caso é que o pobo anda todo alborotado e o pobre Lorenzo non levanta cabeza.

Antes paseaba todo contento coa súa galiña pola rúa, pero agora está na casa e algúns din que a galiña a ten disfrazada de branco para que non lla coñezan. Pero de certo, pouco se sabe.

Eu non sei que vai pasar, porque os veciños están de parte de Lorenzo e da galiña. Non teñas pena, que xa che contarei en que queda isto.

Lorenzo encárgame que che dea lembranzas del e da súa galiña azul...

...Sabes que se arranxou o asunto da galiña azul de Lorenzo?

Verás. O día aquel que che escribín contándoche todo, resulta que a iso das cinco da tarde chegaron os gardas a buscar a galiña azul, de parte de Manolito Listón. Ía moito sol e podía ser un día ben ledo se non fose pola pena que tiñamos todos.

A xente congregouse diante da casa de Lorenzo. Habería para aí máis de mil persoas. Eu tamén fun.

A que non adiviñas o que pasou? Pois o día anterior alguén discorreu que a mellor maneira de arranxar as cousas sería tinguir de azul todas as galiñas do lugar, pintándolles de vermello cinco plumas da á dereita e despois soltalas arredor da galiña azul de Lorenzo. como nós non temos galiñas na casa, eu fun mercar unha á feira de Allariz e tinguina de azul tamén.

Cando chegaron os gardas, atoparon tanta galiña igual que non sabían cal era a de Lorenzo.

Só houbo un pequeno despiste. Foi cousa de Leoncio, que se trabucou e apareceu cunha galiña pintada de vermello. Cando lla viron os gardas, queríanlla matar. Se o vises escapar coa súa galiña debaixo do brazo e berrando: "Para gustos fixéronse colores!".

Agora o Manolito Listón di que cando chova todo se vai arranxar, que as galiñas han perder o tinte e que entón, xa veremos... Pero polo de agora vai moita calor e temos o verán enteiro por diante.

De momento, Lorenzo anda amestrando a galiña para que, ao menos en público, aprenda a dicir cacaracá en vez de cocorocó.

Claro que a xente do lugar ten un contrasinal para coñecer a verdadeira galiña azul. Xa cho direi cando veñas.

Mañá voume de viaxe. Cando volva, seguireiche contando historias, que por aquí sempre hai algo que contar.

Autor: Carlos Casares

Pedro Feijoo

Na semana do libro tivemos unha visita moi especial, o autor Pedro Feijoo veu falarnos do seu libro A memoria da choiva.

Semana do libro no Otero

Esta semana foi moi especial. Recibimos a visita de antigas profesoras do centro que nos viñeron ler un anaquiño do seu libro favorito.











Teba, profesora de E. Plástica e visual,  foi a invitada para 4º ESO. Veu ler Huckleberry Finn de Mark Twain.


















-----------------------------------------------------------------------------------------------


Pedro Feijoo, o autor de A memoria da choiva, leu para o alumnado de 2º un anaco da obra de Suso de Toro, concretamente un relato de Polaroid.







































María Gómez Zamora, a profesora de Matemáticas de 1º, interrompeu a súa baixa para virnos ler un fragmento dunha obra que nos deixou a todos emocionados: A miña planta de laranxa lima de José Mauro de Vasconcelos














 



-----------------------------------------------------------------------------------------
Julia Franco, profesora de Lingua española e literatura, xa xubilada, veunos ler o comezo de Memorias dun neno labrego de Xosé Neira Vilas. Contounos que nun dos seus destinos, tivera a sorte de coincidir varias veces con Neira Vilas. O exemplar que traía estaba asinado polo autor.

 Ademais, tamén nos leu un anaco de Cousas de Castelao.

GLORIA FUERTES en Bibliotero

Durante todo o mes de marzo traballamos coa poesía. Adicámoslle unha atención especial a Gloria Fuertes. A súa obra merece o coñecemento e o recoñecemento sempre, pero máis se cadra neste ano en que lembramos a niversario do seu nacemento. É a súa unha poesía totalmente actual, porque fala de temas que seguen moi vivos e que nos falan de todo o que nos pasa. O alumnado dos nosos Clubs de lectura preparou este recoñecemento cos seus traballos e lecturas na biblioteca.

Recitando a Rosalía 2017

Como todos os anos, escollemos unha selección de alumnado para recitar poemas de Rosalía o día 24 de febreiro.

Un pouco tarde, pero aí vos queda o testemuño do que se fixo ese día.

Grazas por colaborar!!!

Escarlatina, a cociñeira defunta

Como traballo sobre o libro da segunda avaliación, o alumnado de 1º D tivo que cociñar.... algunha das receitas propostas no libro. Moito traballaron, xunto cos seus colaboradores familiares. Penso que foi unha actividade positiva para tod@s. Os rapaces e as rapazas aprenderon a facer distintos pratos e vocabulario sobre a cociña. Ademais, compartiron un tempo coas súas familias. Sempre gusta máis comer algo que un mesmo fixo.

Parabéns a tod@s!!!

Intercambio lingüístico 2017

Os clubs de lectura do CPI Alcalde Xosé Pichel e do IES Ramón Otero Pedrayo volveron vivir un día de Intercambio. Desta volta, o anfitrión foi Coristanco.

Prepararon un fermoso vídeo presentando a súa contorna, as súas parroquias e lugares.

Tamén falamos dos libros que lemos durante este curso, algúns deles, compartidos.

E despois dedicámonos a pasalo ben, pero todos xuntos. A visita ao MELGA foi moi divertida. O seu creador, Ricardo Pérez y Verdes, explicounos tantas e tantas cousas que algúns aínda quedamos con ganas de saber máis. Xogamos ás carrilanas, ao varapau, aos birlos e a moitas outras cousas.

Fomos xantar á praia de Balarés onde tamén fixemos algo de deporte tradicional.

Moitas grazas a tod@s @s que traballaron para que este día fose fantástico.

Árbores senlleiras

Na materia de Investigación, durante a primeira avaliación, realizaron traballos por grupos sobre árbores autóctonas galegas. Tamén fixeron as maquetas das árbores.

Moitos profes quedamos impresionados do traballo e quixemos implicarnos, uníndonos nun proxecto que denominamos Árbores senlleiras.

E aí estamos, Ciencias Naturais, Ciencias Sociais e Lingua galega traballando conxuntamente en todo 1º ESO para poder realizar unha exposición na terceira avaliación. O ritmo de traballo nas aulas está sendo frenético estes días.