Durante todo o mes de marzo traballamos coa poesía. Adicámoslle unha atención especial a Gloria Fuertes. A súa obra merece o coñecemento e o recoñecemento sempre, pero máis se cadra neste ano en que lembramos a niversario do seu nacemento. É a súa unha poesía totalmente actual, porque fala de temas que seguen moi vivos e que nos falan de todo o que nos pasa. O alumnado dos nosos Clubs de lectura preparou este recoñecemento cos seus traballos e lecturas na biblioteca.
Como traballo sobre o libro da segunda avaliación, o alumnado de 1º D tivo que cociñar.... algunha das receitas propostas no libro. Moito traballaron, xunto cos seus colaboradores familiares. Penso que foi unha actividade positiva para tod@s. Os rapaces e as rapazas aprenderon a facer distintos pratos e vocabulario sobre a cociña. Ademais, compartiron un tempo coas súas familias. Sempre gusta máis comer algo que un mesmo fixo.
Os clubs de lectura do CPI Alcalde Xosé Pichel e do IES Ramón Otero Pedrayo volveron vivir un día de Intercambio. Desta volta, o anfitrión foi Coristanco.
Prepararon un fermoso vídeo presentando a súa contorna, as súas parroquias e lugares.
Tamén falamos dos libros que lemos durante este curso, algúns deles, compartidos.
E despois dedicámonos a pasalo ben, pero todos xuntos. A visita ao MELGA foi moi divertida. O seu creador, Ricardo Pérez y Verdes, explicounos tantas e tantas cousas que algúns aínda quedamos con ganas de saber máis. Xogamos ás carrilanas, ao varapau, aos birlos e a moitas outras cousas.
Fomos xantar á praia de Balarés onde tamén fixemos algo de deporte tradicional.
Moitas grazas a tod@s @s que traballaron para que este día fose fantástico.
Na materia de Investigación, durante a primeira avaliación, realizaron traballos por grupos sobre árbores autóctonas galegas. Tamén fixeron as maquetas das árbores.
Moitos profes quedamos impresionados do traballo e quixemos implicarnos, uníndonos nun proxecto que denominamos Árbores senlleiras.
E aí estamos, Ciencias Naturais, Ciencias Sociais e Lingua galega traballando conxuntamente en todo 1º ESO para poder realizar unha exposición na terceira avaliación. O ritmo de traballo nas aulas está sendo frenético estes días.
A ANPA Abrente, en colaboración coa Biblioteca do IES Ramón Otero Pedrayo botan a andar unha iniciativa que ten como filosofía:
"Fagamos do mundo unha biblioteca"
isto é, que todo o alumnado do Instituto teña á súa disposición libros que poderán levar para a súa casa. Agardamos que os volvades traer e que os liberedes por calquera lugar do centro.
Os tres Rs de Bookcrossing son:
READ: le
REGISTER: rexistra
RELEASE: libera de novo
Todos os libros liberados ata o momento están rexistrados en Bookcrossing co nome do Instituto. Esperamos a colaboración de todos e todas. Lede os libros, volvede liberalos e traede outros da casa que xa non vos interesen para deixalos á disposición doutra xente.
